L’intergruppu di e minuranze tradiziunale, di e cumunità naziunale è di e lingue pè a Ghjurnata Aurupea di e lingue
E lingue definìscenu l’Auropa. E lingue definìscenu quale no simu, custruìscenu u nostru sviluppu è ci lèganu à i paesi è à e rigioni induve no campemu. Ogni lingua porta una cunniscenza storica, suciale è culturale uriginale, è dinù un esseru umanu è una visione di u mondu ùnichi. ‘Sse lingue sò u nostru carissimu patrimoniu.
U 26 di sittembre hè a Ghjurnata Aurupea di e lingue. Hè l’uccasione di cilibrà a ricchezza culturale è a diversità di l’Auropa, un valore fundamentale annant’à u quale s’arrimbà u prugettu aurupeu. ‘Ssu ghjornu prumove i benefizii di l’imparerà d’altre lingue aurupee, di a scuparta di e culture nove ch’elle pòrtanu, è di prumesse nove per l’avvene di u mondu. Ùn ci hè nulla chì, più chì u plurilinguismu, pò favurisce a tuleranza di l’altru è l’inclusione, è chì pò fà spannà a criatività è l’innuvazione.
A Ghjurnata Aurupea hè dinù l’uccasione di mette in luce a situazione à spessu dèbula è pricaria di e lingue minuritarie e menu aduprate in Auropa, è a necessità di ricunnosce le, salvà le, è di nutrisce le.
A pandemìa di u coronavirus ci hà datu torna un’illustrazione di stu fattu, criendu sfide nove pè i locutori di ‘sse lingue. A ricerca mostra ch’almenu a mità di e cumunità minuritarie naziunale è linguìstiche tradiziunale ùn avìanu micca accessu à l’infurmazione di basa annantu à a salute in a so lingua materna. I zitelli appartinendu à ‘ssi gruppi minuritarii o linguìstichi anu dinù scuntratu difficultà supplementarie per accede à l’educazione di a so lingua materna, in riguardu à i zitelli appartinendu à a maiuranza. Inoltre, per caghjone di a so dimenzione ridutta, i media è l’attività culturale in e lingue minuritarie sò dinù statu tocche di modu sprupòsitu da a pandemìa. ‘Sse disugualità pròvanu ch’ellu ci resta torna assai à fà, ch’ella sia a u livellu di l’Unione Aurupea cà quellu naziunale, pà garantisce a prutezzione è a prumuzione di e lingue è e culture minuritarie.
Noi, diputati di l’intergruppu di u Parlamentu Aurupeu per e minuranze tradiziunale, e cumunità naziunale è e lingue, suttulinemu l’impurtanza d’assicurà l’utilisazione di a lingua materna, puru si i tempi sò duri. Simu sicuri chè l’usu di e lingue di e cumunità è di i gruppi linguistichi tradiziunali minuritarii in e relazione cù l’auturità pùbliche, in l’educazione è in a vita culturale duveria esse garantitu in ogni Statu membru di l’Unione Aurupea, ch’ella fussi in circustanze nurmale o strasurdinarie. A stu mumentu, puderemu dì chì e lingue aurupee ricèvenu u rispettu ch’elle mirìtanu tutte.
I diputati di l’intergruppu di u Parlamentu Aurupeu per e minuranze.
